Bashkimi Evropian, ka deklaruar se është duke i ndjekur me vëmendje zhvillimet mbi shpërndarjen e vaksinës kundër COVID-19 në veriun e Kosovës nga qeveria e Serbisë.
Ditën e sotme një zëdhënës i BE-së, emri i të cilit nuk është publikuar, ka thënë për Gazetën Express se Kosova dhe Serbia duhet të bashkëpunojnë bazuar në marrëveshjet e dialogut për lëvizjen e mallrave.
“Jemi duke i ndjekur dhe duke i shikuar zhvillimet e raportuara në lidhje me shpërndarjen e vaksinës për COVID-19. Autoritetet në Serbi dhe në Kosovë duhet të bashkëpunojnë ngushtë në vijë me marrëveshjet përkatëse të dialogut për lëvizjen e mallrave dhe certifikimin e produkteve farmaceutike”, ka thënë zëdhënësi i Bashkimit Evropian.
Qeveria e Serbisë para tre ditësh ka shpërndarë edhe në veriun e Kosovës disa vaksina kundër COVID-19, të kompanisë Pfizer/BioNTech, Lajmin për këtë e dha Presidenti i Serbisë, Aleksandar Vuçiç.
Ndërkohë ditën e sotme, Vuçiç ka deklaruar se do të kujdeset për vaksinimin e popullit të tij në Kosovë. Gjithashtu, ai ka thënë se janë të gatshëm të dërgojnë vaksina edhe për shqiptarët.
