Serbia emëron një gjeneral të dënuar për krime lufte si pedagog në akademinë ushtarake të shtetit. Për këtë ka reaguar ashpër Bashkimi Evropian duke kritikuar Serbinë që është kandidate për anëtarësim në union. Sipas BE-së është në kundërshtim me parimet themelore të Unionit.
Tribunali i Kombeve të Bashkuara për krime lufte, dënoi me 14 vjet burg, gjeneralin në pension, Vladimir Lazareviç, për krimet të cilat i kryen trupat serbe në Kosovë gjatë luftës së vitit 1998-99. Lirimi i tij u bë në vitin 2015.
Në një komunikatë të shkruar, zëdhënësja e Bashkimit Evropian, Maja Koncijançiç tha se “liderët politik duhet të bëjnë përpjekje të tejkalojnë trashëgiminë e hidhur, dhe të ecin përpara në mënyrë konstruktive me besim të ndërsjellë, dialog dhe tolerancë”.
Siç shkruan “AA”, ajo tha se “Serbia, si një vend kandidat nuk guxon të devijojë nga këto parime. Emërimi i një të dënuari për krime lufte në Akademinë Ushtarake të Serbisë shkon pikërisht kundër këtyre parimeve”.
