Mëngjesin e sotëm, në pikat kufitare policia e Kosovës u ka hequr targat të gjitha makinave nga Serbia, dhe i ka pajisur me targa prej letre me simbolet e Kosovës. Të gjitha automjetet që hyjnë në Kosovë me tabela nga Serbia, duhet të vendosin targa të përkohshme. Pak më herët, Ministri i Punëve të Brendshme, Xhelal Sveçla njoftonte vendimin për reciprocitetin ndaj Serbisë, sa i përket targave të automjeteve. Referuar vendimit, sqarohet se detyrohet pajisja me targa të përkohshme për të gjitha automjetet që mbajnë targa të Serbisë dhe hyjnë në territorin e Kosovës.
Pajisja me targa të përkohshme bëhet në të gjitha pikat e kalimit kufitar të vendit. Po ashtu, në vendim thuhet se vlefshmëria e këtyre targave të përkohshme është 60 ditë dhe se çmimi për to është 5 euro.
Për të mbikëqyrur zbatimin e marrëveshjes së reciprocitetit për targat, forca të shtuara të Njësisë Speciale të Kosovës janë vendosur sot në pikat kufitare me Serbinë, në veri të vendit.
Në pikën kufitare të Jarinjes, serbët janë grumbulluar dhe kanë bllokuar rrugën me kamionë.
Kryeministri i Kosovës, Albin Kurti, nga Kuvendi ka sqaruar vendimin e qeverisë për vendosjen e reciprocitetit për targat serbe në Kosovë. Kurti u shpreh se vendimi i marrë sot, nuk është dëshirë e qeverisë së tij, por janë të imponuar nga pala serbe.
“15 shtatori i vitit 2021 ishte afati i fundit, kur përfundimisht duhet të përmbyllej marrëveshja e arritur e Brukselit për targat. MB-ja sot mori veprimet e nevojshme për konfiskimin e të gjitha targave ilegale, sikurse edhe në pikat kufitare”, u shpreh Kurti.
