Sëmundjet e aparatit të qarkullimit të gjakut janë ato çfarë shkaktojnë numrin më të madh të vdekjeve në vend. Sipas një raporti të INSTAT, sëmundjet e lartpërmendura janë shkaktare për 53.5% të vdekshmërisë në vend.
Duke iu referuar të dhënave të nxjerra, kuksianët duket se janë më shumë të prekur nga sëmundjet e aparatit të qarkullimit të gjakut.
Vetëm gjatë vitit 2018 kanë humbur jetën 21,804 persona, përfshirë këtu të gjitha rastet: nga sëmundjet, aksidentet apo shkaqe natyrale.
Sëmundjet e enëve të trurit zënë numrin më të madh të vdekjeve, ndërsa më pas vijnë sëmundjet e zemrës apo ishemitë.
Vendin e dytë e zënë vdekjet për shkak të sëmundjeve tumorale, të cilat janë rritur. Vdekshmëria më e lartë për shkak të sëmundjeve tumorale shënohet në Shkodër dhe Vlorë.
Nga statistikat e nxjerra nga INSTAT, duket se më të prekur nga tumoret janë meshkujt, ku vetëm për vitin 2018 kanë humbur jetën 32 burra për 100 mijë banorë, shifër kjo më e lartë se ajo e grave.
Sipas raportit, përqindjen më të lartë e zënë vdekjet për shkak të tumoreve në aparatin tretës.
Ndërkohë Gjirokastra mban numrin më të madh të vdekjeve në vend brenda një viti me 1194 persona të vdekur.
