Presidenti i Kosovës, Hashim Thaçi, ende nuk ka marrë ftesën për të marrë pjesë në seancën e sotme të votimit të Qeverisë së Kosovës. Burimet e ‘IndeksOnline’ brenda Kuvendit të Kosovës kanë thënë se kryetarja Vjosa Osmani, nuk i ka dërguar akoma ftesë presidentit Thaçi, për këtë seancë e cila pritet të nis në orën 11:00. Rikujtojmë se edhe në seancën kur është votuar qeveria Kurti, presidenti nuk kishte pranuar ftesën për të qenë i pranishëm.
Kuvendi i Kosovës sot do të mbajë seancë, ndërsa në rend dite është votimi për Qeverinë Hoti. Seanca do të mbahet në ora 11:00, ndërsa një ditë më parë zyrtarë nga kjo parti kanë thënë se i kanë votat për krijimin e Qeverisë.
Qeveria Kurti u rrëzua më 25 mars, pas votimit të mocionit të mosbesimit, iniciuar nga partneri i koalicionit, LDK-ja. Njoftimi për dekretimin e Hotit erdhi pasi presidenti Hashim Thaçi më 22 prill, konstatoi se Lëvizja Vetëvendosje, si fituese e zgjedhjeve të 6 tetorit, 2019, nuk e kishte shfrytëzuar mundësinë kushtetuese për propozimin e mandatarit. Ndaj këtë të drejtë ia kaloi LDK-së, si partia e dytë mësë shumti vota në zgjedhjet e fundit.
