Drejtori i Përgjithshëm i Policisë së Shtetit, Gledis Nano, ka shprehur ngushëllimet e tij për familjen Avdia për vdekjen tragjike të 7-vjeçares në plazhin e Potamit. Gledis Nano ka kryer sot një vizitë pranë familjes Avdia në Tiranë. Ai ka kërkuar që të mos keqkuptohet vizita e tij, pasi ndodhet aty si prind e si qytetar. Po ashtu, ai ka falenderuar familjen e cila sipas tij, nuk ka mbajtur ngjyrime të caktuara duke i lënë mënjanë.
“Nuk dua të keq interpretohet vizita ime, kam ardhur të shpreh me shumë hidhërim nga shpirti ngushëllimet e mia për humbjen tragjike të fëmijës. Kam ardhur si prind, si qytetar dhe falenderoj familjen Avdia e cila i mirëpriti ngushëllimet e mia, përveç përgjegjësive dhe çfarë ka ndodhur i falenderoj dhe i mirëkuptoj që ngjyrimet e caktuara i kanë lënë mënjanë dhe janë duke vuajtur për atë çfarë ka ndodhur”, tha Nano menjëherë pasi la familjen.
