Debati që po bëhet aktualisht është nëse do të ketë një valë të dytë të koronavirusit. Ekspertët ndajnë qendrime të ndryshme.
Epidemiologu i njohur suedez, Anders Tegnell, shprehet i vendosur se nuk do të ketë një valë të dytë të COVID-19.
“Ne nuk besojmë se do të kemi një valë të dytë klasike, si ato që shohim në pandemitë e gripit kur të kemi përsëri një përhapje të infeksionit në komunitet.
Kjo sëmundje duket se funksionon ndryshe. Virusi përhapet kryesisht nëpër pikat e nxehta, kështu që me siguri do ta shohim dhe kjo është saktësisht ajo që po ndodh në Evropë gjatë vjeshtës. Pikat e nxehta në vende të caktuara si komunitetet e punës”, ka deklaruar ai.
Anders Tegnell e hedh poshtë tezën për një valë të dytë, e ndryshe mendojnë shkencëtarët e tjerë. Ai thotë se gjasat janë të pakta për tu rikthyer në gjendjen që kemi pasur në pranverë.
“Unë mendoj se të gjithë duhet të shqetësohen për këtë sëmundje, sepse vazhdimisht shkakton probleme dhe është shumë e paparashikueshme.
Por fakti që ne do të kthehemi në gjendjen që kemi pasur në pranverë, nuk e shoh që do ndodhë”, tha ai.
