“NATO duhet të shmangë një konfrontim të drejtpërdrejtë ushtarak me Rusinë, që mund të çojë në një luftë të tretë botërore”, tha kancelari gjerman Olaf Scholz në një intervistë me Der Spiegel të Gjermanisë, kur iu kërkua të komentonte pse Gjermania nuk i ka dorëzuar Ukrainës armë të rënda.
“Nuk ka asnjë libër rregullash për këtë situatë, që thotë se në cilën pikë ne konsiderohemi palë në luftën në Ukrainë”, tha Scholz në intervistën e cila u botua të premten.
“Kjo është arsyeja pse është edhe më e rëndësishme që ne të shqyrtojmë çdo hap me shumë kujdes, dhe të koordinohemi ngushtë me njëri-tjetrin,” tha Scholz, duke shtuar se shmangia e “një përshkallëzimi drejt NATO-s është një përparësi kryesore për mua”.
“Nuk duhet të ketë luftë bërthamore”, tha Scholz.
“Kjo është arsyeja pse unë nuk përqendrohem në sondazhe, ose nuk e lë veten të irritohem nga thirrjet e mprehta. Pasojat e një gabimi do të ishin dramatike”, shtoi ai.
Scholz po përballet me kritika në rritje nga brenda Gjermanisë dhe jashtë vendit për hezitimin e pretenduar të qeverisë së tij, për të dorëzuar armë të rënda në Ukrainë, ndërsa pushtimi i Rusisë ka hyrë në një fazë të re dhe potencialisht vendimtare.
Në intervistë, Scholz paralajmëroi se “nuk mendon se është e justifikuar që Gjermania dhe NATO të bëhen palë ndërluftuese në Ukrainë”.
Scholz tha gjithashtu se ai nuk beson se një embargo ndaj gazit rus, do t’i jepte fund luftës në Ukrainë.
“Unë absolutisht nuk e kuptoj se si një embargo gazi do t’i jepte fund luftës. Nëse (presidenti rus Vladimir Putin) do të ishte i hapur ndaj argumenteve ekonomike, ai kurrë nuk do ta kishte filluar këtë luftë të çmendur”, tha ai.
Burimi i lajmit: CNN. Përshtatur nga Tirana Today
