Kryeministri Rama i është rikthyer sërish një çështje mjaft të debatueshme, e cila ka të bëjë me satelitët ‘Albania 1’ dhe ‘Albania 2’. Një vit më parë, kryeministri Edi Rama tha se “kontrolli mbi territorin, mbi trafiqet dhe mbi kufijtë, do të kalojë në nivelin e teknologjisë dhe do të hiqet nga duart e atyre që kontrollojnë me sy”.
Sot, i pranishëm në konferencën për bujqësinë, kreu i qeverisë i është rikthyer premtimit të dhënë për satelitët. Ai është shprehur se ka pasur vonesa dhe brenda këtij viti ideja e tij do të realizohet, me institucionet shqiptare që do të inspektojnë më pas bujqësinë nga qielli, jo vetëm me dronë por edhe me satelitë.
“Na duhet të shtyjmë më shumë tek teknologjia dhe inovacioni. Nëse mbi 15 mijë fermerë duan naftë, po sa traktorë ka ky vend se nuk del llogaria? Ka një shkallë fiktiviteti. Si do të adresohet? Do të adresohet përmes teknologjisë dhe formalizimit.
Nga një anë me regjistrin e tokës dhe vënien në përdorim dronët dhe satelitëve. Përmes formalizmit me regjistrin e fermës, regjistrin digjital të fermës dhe vënien në përdorim të dronëve e satelitëve që për shkak të procedurave kanë marrë më shumë kohë sesa e kishim parashikuar. Por do të vijnë brenda këtij viti dhe me faturat, naftën do ta marrësh por duhet të sjellësh faturat. Ne nuk kemi dashur ta bëjmë të vështirë dhe të lodhshme, prandaj ne jemi duke punuar që inspektimin ky vend ta çojë në qiell. Ta bëjë me satelitë, drona dhe jo me inspektorë”, tha Rama.
