Kryeministri i Spanjës, Pedro Sanchez është shprehur se vendi e ka arritur pikun e koronavirusit, teksa shtoi se po mendohet për masa lehtësuese për të dalë nga izolimi.
Deklaratat e Sanchez vijnë pas rënies së numrit të viktimave nga koronavirusi në Spanjë, në ditët e fundit. Ai u shpreh që kjo ishte situata me e vështirë që ka kaluar Spanja që nga gripi spanjoll në vitin 1918.
Sanchez paralajmëroi se edhe vetë nuk e di, se në çfarë normaliteti do të rikthehet Spanja pasi situata nga koronavirusi ka sjellë goditje të sistemit shëndetësor por dhe sektorit të turizmit që është baza e ekonomisë spanjolle
Sipas Worldometer, në orët e fundit në Spanjë kanë humbur jetën 446 persona. Deri më tani Spanja regjistron 15,238 viktima dhe mbi 152 mijë raste infektimi.
Mbi 52 mijë pacientë janë shëruar nga koronavirusi, ndërsa mbi 80 mijë raste janë ende aktive. Spanja renditet e dyta në rang global si për numrin më të madh të viktimave (pas Italisë), ashtu edhe për numrin më të madh të rasteve (pas SHBA-ve).
