Deputeti demokrat, Ervin Salianji, ka thirrur në interpelancë ministrin e Brendshëm, Blendi Çuçi. Ai e ka pyetur lidhur me aksionin e qeverisë për ndërtimet pa leje, si edhe për situatën e krimit në vendin tonë. Me ironi ai krahasoi situatën e krijuar mes policisë dhe kriminelëve në kërkim, duke shtuar se uniformat blu bien në gjurmët e tyre vetëm kur kanë probleme me njëri-tjetrin.
“Zoti ministër, faleminderit që të gjetëm sot se të kemi shpallur në kërkim që prej një muaji. Jeni bërë si ju me policinë, i shihni kriminelët dhe nuk i kapni. Dhe ne të shohim këtu, por nuk të kapim dot. Prej vitesh, situatë me kriminalitetin është rënduar.
Përditë shohim në media dhe në zonat tona si qytetarët na drejtohen me mungesën e sigurisë në këtë vend. Ndeshen me paaftësinë e Policisë së Shtetit dhe kjo reflektohet edhe te policët e thjeshtë. E kam kërkuar këtë interpelancë në fillim të shtatorit, pas ngjarjeve të rënda të ndodhura në rrugët kryesore.
Ngjarjet kriminale po ndodhin çdo ditë, dhe policia i gjen vetëm kur kanë problem me njëri-tjetrin. Kam disa pyetje. Një prej tyre është shqetësimi për trafikun e qytetarëve shqiptarë që mbushën gjatë gjithë verës gazetat kryesore britanike”, deklaroi ai.
