Mohamed Salah është rikthyer të flasë për dëmtimin në finalen e Champions League, ku humbi shansin për të luajtur deri në fund ndeshjen e shumëpritur prej tij. Ai e cilëson atë ndërhyrje të Sergio Ramos si momentin më të keq në karrierën e tij. Ishte minuta e 30’ kur egjiptiani u detyrua të lëri fushën me lot në sy, ku të gjithë shpresat e tifozëve të Liverpool ishin tek ai.
Ramos vetëm pak ditë më parë dha mendimin e tij mbi atë çështje, ku u shpreh se Salah mund ta përfundonte ndeshjen duke marrë një injeksion. Ndërsa Salah në një prononcim për “Marca” u shpreh: “Komenti im? Ai që më bëri të qaj, së pari, tani po më bën të qesh… Ndoshta ai, gjithashtu, mund të më tregojë nëse do të jem gati për Kupën e Botës”.
I pyetur për deklaratën e Ramos se ka një mundësi që Salah ta ketë kapur vetë për krahu qendërmbrojtësin spanjoll gjatë dyluftimit dhe jo e kundërta, egjiptiani shtoi: “Kjo Është qesharake… Ai më dërgoi një mesazh, por kurrë nuk i thashë se ishte në rregull ndërhyrja e tij. Kur rashë në tokë kisha një përzierje të dhimbjeve fizike dhe shumë shqetësime.
Gjithashtu, zemërim dhe trishtim për të mos qenë në gjendje të vazhdoja të luaja finalen e Ligës së Kampionëve. Momente më vonë, gjithashtu, mendova për mundësinë që të mos luaja dot në Kupën e Botës. Ky ishte një mendim shkatërrues”.
Egjipti do ta hapë Botërorin e Rusisë kundër Uruguait, më 15 qershor, teksa Salah shpreson se do të jetë i aftë për t’u shfaqur në atë lojë, një mundësi që nuk dukej e mundur kur doli jashtë fushe në lot, në finalen e Kievit.
Egjipti do të përballet, gjithashtu, me Rusinë dhe Arabinë Saudite, ndërsa përgatitet t’i japë fund pritjes 28-vjeçare për të konkurruar në fazën finale të Kupës së Botës. Salah e analizon kështu këtë moment: “Është hera e parë në 28 vjet që jemi kualifikuar. Nuk ishte normale, sepse ne fituam Kupën Afrikane shtatë herë dhe ne ishim kampionë në 2006, 2008 dhe 2010. Ishte e zakonshme për të fituar Kupën e Afrikës, por nuk u kualifikuam për Kupën e Botës.
Dhe kjo ishte diçka që na motivoi. Të gjithë thamë: “Ouuu, ne duhet ta bëjmë atë, duhet ta bëjmë. Nuk e kishim arritur fazën finale të Botërorit për një kohë të gjatë dhe kualifikimi ishte diçka shumë e veçantë. Ndoshta si për Spanjën, që të fitojë Kupën e Botës”.
