Prej 25 marsit çdokush që kalon në Rrugën e Kombit, duhet të paguajë një tarifë të caktuar.
Tarifat nga java e ardhshme për të kaluar në Rrugën e Kombit
Klasa 1 motor – 2.5 euro
Klasa 2 veturë – 5 euro
Klasa 3 autobus & kamionçinë – 11.2 euro
Klasa 4 kamion i mesëm – 16.2 euro
Klasa 5 kamion i rëndë – 22.5 euro
Ndërtimi i saj filloi në 2007, gjatë qeverisjes Berisha. Por, sipas qeverisë aktuale, rruga është e papërfunduar dhe duhet mirëmbajtur, ndaj nevojiten fonde shtesë.
Në një intervistë për Tirana Today, deputeti i PD-së Edmond Spaho dhe analisti Mentor Nazarko, flasin për kushtet e rrugës dhe tarifën që duhet të paguajnë automjetet.
Deputeti Spaho e cilëson të papranueshme këtë shumë, duke thënë se kjo do të sjellë uljen e hyrjeve për në Shqipëri.Ndërkohë, analisti Nazarko, thotë se është një shifër e përballueshme nga qytetarët e Kosovës, të cilët vijnë për sezonin turistik në vendin tonë. Ai thotë se skema e vendosur në kohën e qeverisjes së PD-së, sa i takon Rrugës së Kombit ishte e gabuar, për shkak të terrenit malor. Dhe sot, jemi duke paguar pasojat e një vendimi të gabuar.
Që prej “taksës Majko” në 1998, e deri më sot, janë qytetarët ata që vazhdojnë të paguajnë. Për verilindorët pagesa për Rrugën e Kombit është poshtëruese.
Ndërkohë, Qeveria e Kosovës thotë se nuk kanë pasur konsultime nga ana Shqiptare. Deputeti Spaho tha për Tirana Today, se qeveria e kishte të detyrueshme të negocionte me qeverinë në Kosovë, në mënyrë që edhe ata të viheshin në dijeni. Por, analisti Nazarko shton se ky është një vendim i njohur që më parë. Tirana Today
