Me rastin e martesës së tij në vitin 1938, mbreti i Shqipërisë Ahmet Zogu, mori shumë dhurata. Por kryedhurata, ishte ajo që iu bë nga kancelari nazist i Gjermanisë, Adolf Hitleri. Një Mercedez Benz sportiv kabriole në ngjyrë të kuqe.
Automjeti mbërriti në Shqipëri në rrugë tokësore nga Shkodra. Për prodhimin e saj u deshën gati 6 muaj, dhe cilësohej si kryevepra inxhinierike e kohës, dhe maksimumi i luksit që njihej. Mjeti që iu dhurua mbretit Zog, ishte një model i njëjtë me atë që Hitleri i kishte dhuruar po atë vit për martesë Mbretit Faruk të Egjiptit dhe liderit sovjetik, Josif Stalin, me rastin e ditëlindjes.
Makina ishte e kuqe, me veshjen e brendshme bezhë, dhe me stemën mbretërore të stampuar në të dyja dyert. Pas pushtimit të Shqipërisë nga Italia një vit më pas, Zogu e mori atë me vete në Britani, kur e përdori vetëm në një rast.
Ndaj në vitin 1944, me nxitjen e bashkëshortes Geraldinë, ai i dhuroi makinën Kryqit të Kuq Britanik. Dhe ky i fundit ia shiti një personi privat në vitin 1946. Për herë të fundit, makina figuroi si pronë e një koleksionisti makinash, që në vitin 1987 e vendosi në një muze në Ilinois të SHBA për 3 vjet.
Më pas nuk ka më gjurmë të saj. Disa besojnë se ajo është pjesë e koleksionit privat të stilistit të njohur Ralf Loren. Por ky i fundit as e ka pohuar dhe as e ka mohuar këtë gjë. Simotra e saj identike, makina e Mbretit Faruk, u shit në vitin 2006 në një ankand në Monte Karlo për shumën 921 mijë euro.
