Një punonjës i Policisë në Tiranë është vënë në pranga, ndërsa akuzohet për “shpërdorim detyre”. Bëhet fjalë për Alkid Ndreu, anëtar i Komisionit të gjobave, në varësi të Drejtorisë Vendore të Policisë Tiranë.
Sipas hetimeve është zbuluar se ka marrë 70 mijë lekë të reja për dhënien e patentës së një shtetaseje, që ishte pezulluar për tre muaj.
Nga verifikimet ka rezultuar se qytetarja me inicialet B.D., e kishte të bllokuar lejen e drejtimit që nga data 24 nëntor deri më datë 17 shkurt të vitit 2023.
Por, pasi pagoi shumën e parave tek oficeri 48 vjeçar, Ndreu e mori patentën e vajzës nga Kartoteka në varësi të Drejtorisë së Policisë Tiranë dhe ia riktheu asaj.
Po ashtu, në pranga është vënë edhe Eduart Caka nga Kruja. Ky i fundit, sekser i oficerit të policisë. Caka rezultoi se ka marrë paratë nga qytetarja dhe ia ka dorëzuar oficerit Alkid Ndreu.
