Rusia gati të prodhojë vaksinën e dytë: Efektive ndaj çdo varianti të Covid-19

Shkencëtarët rusë që qëndrojnë pas vaksinës së dytë të vendit kundër Covid-19, EpiVacCorona, thanë se ajo ishte efektive kundër varianteve të koronavirusit.

Vendi filloi provat masive të EpiVacCorona, e cila po zhvillohet nga Instituti Vektor i Siberisë, në nëntor të vitit të kaluar, shkruan agjencia e lajmeve, Reuters.

Fondi i pasurisë sovrane RDIF i Rusisë tha se një firmë amerikane kishte shkelur të drejtat e patentës ruse në vaksinën e saj Sputnik V. RDIF, e cila tregton aktivisht Sputnik V jashtë vendit, nuk e bëri të ditur emrin e ndërmarrjes.

Ndërkohë, edhe vendi ynë është furnizuar me vaksinën Sputnik V, pasi ditën e sotme në aeroportin ”Nënë Tereza”, mbërritën 10 mijë doza të cilat janë dhuratë nga Princi i Kurorës së Emirateve të Bashkuara, Muhammed Bin Zayed.

Vaksina ruse Sputnik V, ende nuk e ka marrë miratimin nga Agjencia Europiane e Barnave (EMA), megjithatë disa shtete kanë filluar përdorimin e saj.