Presidenti rus Vladimir Putin nënshkroi të hënën një ligj që zyrtarizon daljen e Rusisë nga traktati i kontrollit të armëve të Qiejve të Hapur, një pakt që lejon fluturime të mbikqyrjes së paarmatosur mbi vendet anëtare.
Rusia kishte shpresuar që Putini dhe Presidenti i SHBA Joe Biden mund të diskutojnë mbi traktatin kur të takohen më vonë këtë muaj në një samit në Gjenevë.
Por administrata e Biden informoi Moskën në maj se nuk do të hynte përsëri në pakt pasi administrata Trump e la atë vitin e kaluar, shkruan agjencia e lajmeve, Reuters.
Në janar të këtij viti, Rusia njoftoi planet e saj për të lënë traktatin dhe qeveria paraqiti legjislacionin në parlament muajin e kaluar për të zyrtarizuar largimin e saj.
Zyrtarët rusë thanë se vendimi i SHBA-së për të mos u ribashkuar, është një “gabim politik”, ndërsa Moska dhe Uashingtoni po përgatiten për një samit midis presidentëve të vendeve këtë muaj.
Traktati i Qiejve të Hapur hyri në fuqi më 1 janar 2002, i cili parashikohet si një masë për rritjen e besimit dhe sigurinë në hapësirën e OSBE-së.
