“Rusi 2018”/Conte “armiku”, ja yjet që rrezikojnë të mbesin në shtëpi

Trajnerët e ekipeve kombëtare do të kenë në dispozicion edhe dy ndeshje miqësore për të hartuar listën e lojtarëve të cilët do të marrin pjesë në Botërorin “Rusi 2018”. Një pjesë e lojtarëve të mëdhenj rrezikojnë të humbin shansin për të qenë në Rusi, sigurisht që nuk bëhet fjalë për Ronaldon, Messin dhe Neymar.

Sipas prestigjiozes “Marca”, Spanja mund të marrë vendimin që të lëri jashtë Alvaro Moratën, pasi ky i fundit nuk është aktivizuar rregullisht nga Antonio Conte tek Chelsea. Gazeta spanjolle jep edhe mundësitë që ka Ibrahimoviç për të luajtur në Botëror, pavarësisht se ai tani është në fund të karrierës dhe me United nuk ka luajtur fare për shkak të dëmtimit. Ibra i ka dhënë lamtumirën kombëtares, por ekziston mundësia që të rikthehet.

Brazili– David Luiz ishte protagonist në Botërorin e vitit 2014, por këtë herë mund ta ndjekë kompeticionin nga televizori. Raporti i vështirë me Conten ka bërë që ai ta humbasë vendin e titullarit. Edhe mbrojtësi i Cityt, Danilo, ndoshta nuk e bind sa duhet trajnerin Tite, sepse dëmtimet e kanë lënë për shumë kohë jashtë fushave.

Gjermania- Ekipi i Lëvit mund të humbasë më shumë kampionë sesa kombëtaret e tjera. Duhet ende kohë për të kuptuar nëse Neuer do të jetë gati apo do të qëndrojë larg fushave të lojës. Megjithatë, portieri i Bajernit nuk është dyshimi i vetëm. Rous, Gëce dhe Vajgël gjithashtu mund të mbeten jashtë listës.

Argjentina- Dybala dhe Icardi janë dy sulmues të mëdhenj, por ndoshta vetëm njëri prej tyre do të marrë pjesë në Botëror. Me Higuainin që duket se është rikthyer në formë dhe e ka vendin e sigurt, Sampaolit i duhet të vendosë të lërë jashtë njërin. Nuk është e lehtë, por s’mund të marrë kaq shumë sulmues, duke parë se sa të tjerë ka në dispozicion. Edhe Javier Pastore është në dyshim serioz, por edhe portieri Guliermo Ruji.

Anglia– Antonio Conte tha se nuk do t’i interesonte aspak nëse Cahill dhe Morata nuk shkojnë në Botëror, sepse ai kujdeset vetëm për ecurinë e Çelsit. Mbrojtësi anglez i bluve të Londrës e ka humbur vendin e titullarit dhe mund të përjashtohet nga Sauthgate, po ashtu si Sturidge.

Portugalia– Ndryshe nga Europiani 2016, Portugalia mund të paraqitet në Rusi me një fytyrë të re dhe kampionët si Pepe, Nani, Renato Sançes apo të tjerë mund të mbeten në shtëpi.