Vajza e Azem Hajdarit, znj Rudina Hajdari, ka deklaruar për mediat në ceremoninë përkujtimore të të atit se figura e tij është frymëzim për të dhe për të gjithë të rinjtë. Kur kanë kaluar 24 vite nga vrasja e tij, Rudina Hajdari akuzoi kryeministrin Edi Rama se po kontrollon të gjitha pushtetet.
Në të njëjtën kohë ajo apeloi ndaj të rinjve, që nën shembullin e Azem Hajdarit, të luftojnë për më shumë liri dhe meritokraci. Sipas saj, shqiptarët kanë humbur të gjitha shpresat se ndryshimi do vijë. Mesazhi që ajo përçoi ndaj të rinjve është që të organizohen për të luftuar për ëndrrat e tyre.
“Sot nderojmë figurën dhe veprën e Azem Hajdarit, që sakrifikoi jetën dhe rininë e tij për të çuar në piedestal idealet më të larta. Kur shumë njerëz kishin humbur shpresën që ndryshimi do vinte, Azemi u çua dhe sfidoi regjimin më të egër komunist dhe organizoi studentët në shesh me protesta dhe revolta. Azemi qëndroi besnik ndaj atyre parimeve, dhe ai do mbetet nga figurat më të pastërta.
Shqipëria sot ka ndryshuar fizikisht, por politikisht mendoj që jemi në kushte shumë të ngjashme. Shqipëria po kontrollohet nga një grup njerëzish me në krye Edi Ramën, teksa shqiptarët kanë humbur të gjitha shpresat se ndryshimi do vijë.
Ndaj mendoj që Azemi është figura që ne mund të bazohemi dhe të mendojmë që ai është personi që në vitin ‘90 u çua për të sjellë ndryshimin. Mesazhi im sot është për të rinjtë dhe të rejat, që hajde organizohemi, çohemi dhe të luftojmë dhe të guxojmë për ëndrrat tona, t’i fitojmë betejat tona për më shumë liri, demokraci, meritokraci”, tha Rudina Hajdari.
