Kryetari i Kuvendit Gramoz Ruçi ditën e sotme i ka dërguar një urim Sekretares së Përgjithshme të Këshillit të Evropës, Marija Pejcinovic Buric, me rastin e zgjedhjes së saj në këtë detyrë.
“Me rastin e zgjedhjes Tuaj në detyrën e lartë të Sekretares së Përgjithshme të Këshillit të Evropës, organizatës panevropiane, promotorë e mbrojtjes dhe konsolidimit të demokracisë, shtetit të së drejtës dhe të drejtave të njeriut, Ju uroj shumë suksese në përmbushjen e kësaj detyre fisnike dhe impenjative.
Jam i bindur se përvoja dhe profili i Juaj profesional dhe politik do të kontribuojnë në avancimin e misionit të Këshillit të Evropës në mbështetje të parimeve, vlerave dhe standardeve evropiane. Gjithashtu shpreh bindjen se bashkëpunimi midis Kuvendit të Shqipërisë dhe Këshillit të Evropës do të vazhdojë të fuqizohet, në të mirë të përmirësimit të standardeve demokratike, rritjes së mirëqenies ekonomike e sociale dhe integrimit evropian të Shqipërisë dhe të Ballkanit Perëndimor”, shkruhet në letrën e urimit të Kryetarit të Kuvendit Gramoz Ruçi.
