Ish-drejtuesi i Lartë i Policisë së Shtetit, Mit’hat Havari, u shpreh se prokurori Arjan Ndoja ka qenë në shkelje flagrante të ligjit, në momentin që shoqërohej me persona me precedentë penalë. Këtu ai ka përmendur Land Muharremin, që ndryshe njihet si “Rrumi”.
I ftuar në emisionin “Repolitix”, Havari ka folur dhe për dosjet e gjetura në makinën e prokurorit Ndoja. Ai tha se dosjet nuk mund të merren me vete, pasi ato duhet të qëndrojnë në zyrë!
“Një prokuror nuk mund të qëndrojë në makinë me persona me precedentë penalë. I gjithë shteti ju nënshtrua një djali të ri nga Durrësi. Ndoja e di shumë mirë kush është ai. E di unë që jam qytetar i thjeshtë, si nuk e di ai? Dhe ndalohet marrja e dosjes me vete në shtëpi. Dosja rri në zyrë, në kasafortë, shkon dhe punon jashtë orarit. Dhe kjo tjetra që ka studio ligjore, kjo është shkelje e hapur e ligjit. Shkelje flagrante e ligjit”, u shpreh Mit’hat Havari.
Prokurori Arjan Ndoja, shoferi i tij, ish-polici i Krujës Andi Maloku dhe një person i akuzuar për një sërë ngjarjesh kriminale, Landi Muharremi (Aleksandër Laho), ngelën të plagosur, pasi ndaj tyre u qëlluan mbi 20 plumba.
Landi Muharremi ka ndërruar emër, dhe se ai tashmë njihet si Aleksandër Laho. Muharremi është nga Sukthi i Durrësit, një person me precedentë të shumtë kriminalë. I njohur si i “forti i Shijakut”. Më herët mësohet se ai ka përdorur edhe emrin Pëllumb Muharremi. Ai njihet ndryshe me nofkën “Rrumi”.
