Gazetarja Klodiana Lala në “Real Story”, ka treguar arsyet se përse atentati ndaj prokurorit Arjan Ndoja nuk ka shkuar deri në fund. Ajo ka zbuluar se atentatorët kanë qenë dy, dhe kanë qëlluar me dy armë të ndryshme. Po sipas saj, shënjestra nuk ka qenë prokurori.
“Diku në afërsi të mbikalimit të Shkozetit, një automjet i është vënë në ndjekje. Ka dyshime se shënjestër ka qenë ‘Rrumi’ e jo prokurori, sepse kanë nisur të fillojnë të qëllojnë disa herë me armë në mes të makinës.
Afro 40 minuta më vonë është zbuluar në Ishëm një automjet, dhe ka rezultuar se njëra prej armëve është bllokuar.
Duke qenë se më pas ka ngelur vetëm një atentator, plani nuk ka shkuar deri në fund”, tha Klodiana Lala.
Prokurori Arjan Ndoja, shoferi i tij, ish-polici i Krujës Andi Maloku dhe një person i akuzuar për një sërë ngjarjesh kriminale, Landi Muharremi (Aleksandër Laho), ngelën të plagosur, pasi ndaj tyre u qëlluan mbi 20 plumba.
Në makinën që u bë shoshë nga plumbat te mbikalimi i Shkozetit në Durrës, ndodhej edhe një person që nuk është emër i panjohur për Policinë e Shtetit. I skeduar disa herë për ngjarje të rënda kriminale, pjesa më e madhe e të cilave nuk i është provuar, Aleksandër Laho, emri me të cilin njihej së fundmi, ishte mik i prokurorit të Durrësit.
Ai po ashtu mbeti i plagosur me një plumb në nofull. Njihet si “i forti” i Shijakut. Të gjithë e thërrasin me pseudonimin “Rrumi”, ndërsa policia thotë se ai e ka ndryshuar emrin të paktën dy herë. Fillimisht quhej Pëllumb Muharremi, më pas Landi Muharremi, emër i cili është shënuar shpesh në regjistrat e Policisë së Durrësit, por edhe të Tiranës. Ndërsa së fundmi, 48- vjeçari e kishte ndryshuar sërish emrin, dhe në dokumente figuron si Aleksandër Laho.
