Kryeministri Edi Rama ka zhvilluar sot një dëgjesë me qytetarët e Dibrës mbi projektbuxhetin 2018.
Rama njoftoi prezantimin e projektit të Rrugës së Arbrit, teksa tha se ajo do të përfundojë brenda mandatit të dytë të qeverisë.
“Kemi gjetur një marrëveshje të bërë me sy mbyllur nga qeveria e mëparshme me një kompani kineze për 17 km dhe me një angazhim marramendës, gjë për të cilën ne negociuam disa vjet dhe vendosëm ta ngadalësojmë, tani kemi 40 km kemi edhe lidhjen e Klosit me Burrelin me aksin që do të thotë se qytetarët e Burrelit do të kenë një mundësi të re për të arritur në Tiranë me gjysmën e kohës e gjysmën e distancës. Këtë muaj kantieri do të hapet dhe nuk do të ndalojë deri sa të ndërtohet plotësisht Rruga e Arbërit. Zotohemi për ta garantuar këtë rrugë brenda 4-vjeçarit”, tha Rama.
Po ashtu, kryeministri është tërhequr lidhur me aksionin ndaj ujit të pijshëm, teksa vetë ai deklaroi se puseve do u vendosej matësa.
Rama nënvizoi se nuk bëhet fjalë për puset e qytetarëve, por për fabrika uji, apo industri:
“Dje patëm një darkë të këndshme me kryetarët e bashkive të qarkut Dibër, dhe ishte kënaqësi e madhe që diskutuam për problemet e njerëzve. Folëm edhe për puset e famshme dhe qartësisht dua ta përsëris se qeveria në bashkëpunim me bashkitë është e vendosur ta çojë deri në fund reformën për ujin dhe reformën kundër vjedhjes së tyre. Nuk bëhet fjalë për taksë pusesh, nuk bëhet fjalë për puset familjare. Kur themi puse, ka puse industriale. Ka fabrika uji që marrin ujë masivisht nga nëntoka. Nuk bëhet llaf për të vendosur taksë. Taksa është e tepërt, por tarifë. Ne problemin e kemi ujin e pijshëm”, tha Rama.
Po ashtu, kryeministri njoftoi dhënien e librave falas për nxënësit e fillores, me kusht kthimin mbrapsht të librave në përfundim të vitit shkollor.
