Rakip Suli pritet që gjatë ditës së sotme, të bëjë betimin e tij si kryetari i ri i Bashkisë së Kamzës.
Prefektja e Tiranës, Suzana Jahollari, ka thirrur mbledhjen e parë të Këshillit Bashkiak Kamëz, e cila do të mbahet në ambientet e shkollës “Hillary Clinton”.
Menjëherë pas vendimit të Jahollarit ka ardhur edhe reagimi i Partisë Demokratike. Nënkryetari i kësaj partie, Edmond Spaho, u shpreh se PD ka bërë një kallëzim penal ndaj prefektes, pasi sipas tyre, ajo ka abuzuar me detyrën.
Ai theksoi se Partia Demokratike e dënon me forcë këtë akt të paligjshëm të saj, duke e konsideruar atë një ndërhyrje flagrante të qeverisë në ushtrimin e kompetencave të pushtetit lokal.
“Padurimi i Edi Ramës për të kontrolluar çdo pushtet në vend dhe, nëpërmjet tij, të grabisë çdo pasuri të vendit, e ka shtyrë atë në thellimin e paligjshmërisë së 30 qershorit, duke urdhëruar prefekten e Tiranës të uzurpojë kompetencat e pushtetit lokal në Bashkinë e Kamzës. Këshilli Bashkiak i Kamzës ishte thirrur për konstituim në datën 14 gusht nga sekretari aktual i Këshillit, por, në shkelje flagrante të ligjit, prefektja e Tiranës ka vendosur që e njëjta mbledhje të bëhet nesër, sepse Edi Ramës nuk i pritet që të pushtojë Bashkinë e Kamzës. Ligji i pushtetit lokal ia jep këtë kompetencë sekretarit aktual, por, megjithëse ai e ka ushtruar atë rregullisht, duke thirrur konstituimin e Këshillit Bashkiak të Kamzës brenda afatit, përfaqësuesja e Edi Ramës ka vendosur të cenojë autonominë e pushtetit lokal dhe të uzurpojë kompetencën e sekretarit të Këshillit Bashkiak”, deklaroi Spaho.
