Kryetari i Bashkisë së Tiranës vendosi të rrisë me 44% çmimin e ujit për qytetarët e Tiranës, vendim ky që u miratua në Këshillin Bashkiak të Tiranës me 31 vota pro.
Konkretisht, 25 vota ishin nga PS, dy të LSI (Genta Mezini dhe Agim Kraja), tre të PDIU dhe një e FRD, duke i hapur kështu rrugë Bashkisë së Tiranës për të kërkuar rritjen e çmimit të ujit nga Enti Rregullator i Ujit (ERU).
Gjatë gjithë kohës, kryebashkiaku Veliaj është “fshehur” pas rritjes së çmimit të ujit, duke u kapur te ajo që e quan furnizim i Tiranës me ujë të pijshëm në 24 orë.
Madje, Veliaj edhe u bëri moral shqiptarëve, teksa tha se “le të kursejnë një kafe prej 70 lekësh dhe të paguajnë ujin, që është shumë i rëndësishëm”.
Jo vetëm kaq, por kryebashkiaku Veliaj shkeli premtimin e tij, të bërë më 24 gusht 2016, ku tha se kompania Ujësjellës Kanalizime Tiranë do të privatizohet, por atëherë ai siguronte që çmimi i ujit nuk do të rritej.
Megjithatë, kjo lëvizje e Veliajt duket se nuk është pëlqyer nga kryeministri Rama, të cilit një vendim i tillë mund t’i prishë shumë punë politikisht.
Kështu, së fundmi Autoriteti i Konkurrencës i ka dhënë të drejtë këshilltarëve të opozitës, duke e konsideruar jo të drejtë vendimin për rritjen e çmimit të ujit, teksa vendosi që t’i rekomandojë Entit Rregullator të Ujit:
1. Detyrimin për zbatimin e nenit 69 dhe 70 të Ligjit nr. 9121/2003 “Për mbrojtjen e konkurrencës” (i ndryshuar), duke kërkuar vlerësimin ligjor të Autoritetit të Konkurrencës për çdo projekt-akt normativ që potencialisht mund të sjellë kufizime të konkurrencës në tregun përkatës.
- Për çdo rast të rishikimit të tarifave të reja për ndërmarrjet e ujësjellës kanalizime, të përcaktohet qartë struktura e kostos mbi bazën e së cilës miratohen tarifat, bazuar në metodologjinë “Për vendosjen e tarifave për shërbimin e furnizimit me ujë dhe largim e përpunimin e ujërave të ndotura”, në të cilën përfshihen kostot e:
– Tarifës së ujit për shitje sipas kategorive të konsumatorëve;
– Tarifës për Shërbimin e Grumbullimit, Largimit e Përpunimit të Ujërave të Ndotura ;
– Tarifës së shërbimit.
- Rritja e tarifave duhet të jetë graduale dhe në përputhje me kriteret e performancës, në mënyrë të veçantë të orarit të furnizimit me ujë.
- Të rishikohen kostot në drejtim të rritjes së performancës së administrimit dhe të rishpërndahen burimet e të ardhurave të kërkuara për investime edhe nga ulja e kostove të operimit dhe mirëmbajtjes pasi sipas vendimit të ardhurat do të vijnë në masën 96% nga rritja e tarifave, dhe vetëm 4% nga rritja e nivelit të faturimit.
- Publikimin dhe bërjen transparente brenda 30 ditëve nga dalja e këtij vendimi të të gjithë informacionit në lidhje me aplikimet për ndryshimin e tarifave, kostot përkatëse mbi të cilat bazohen këto ndryshime, si dhe për vitet 2018 dhe 2019 të publikohen treguesit e parashikuar për “ujin pa të ardhura”, “Kohëzgjatjen e furnizimit” dhe “Efiçencën e stafit”.
Komisioni i Konkurrencës/Vendim_nr._492_dt._28.12.2017 by Tirana Today on Scribd
Duket se kreu i Bashkisë së Tiranës ka menduar të kalojë këtë vendim me shpejtësi, duke u shtuar qytetarëve një tjetër taksë, por këtë herë është vetë kryetari i partisë së tij që ka ndërhyrë.
Një ndër arsyet përse Rama mund të ketë marrë këtë vendim është me siguri edhe përkeqësimi i imazhit në sytë e qytetarëve.
Edhe pse Veliaj është munduar ta justifikojë bukur në media rritjen e çmimit të ujit me 44%, një taksë shtesë me siguri që do të thotë më shumë protestues, më pak vota dhe më shumë të pakënaqur ndaj grupit të PS-së.
Kështu e sheh vendimin e Komisionit të Konkurrencës edhe deputeti i PD-së, Edi Paloka, i cili shkroi sot në një postim në Facebook se anulimi i vendimit për rritjen e çmimit të ujit është thjesht efekti i parë i protestës, vendim ky i marrë nga Rama që njerëzit të mos i bashkohen protestës së opozitës që mbahet më 27 janar.
Edhe kreu i këshilltarëve të djathtë në Bashkinë e Tiranës, Kreshnik Çollaku, i bëri thirrje Erion Veliajt të reflektojë dhe të tërhiqet nga vendimi për rritjen e çmimit të ujit të pijshëm, pasi Autoriteti i Konkurrencës, kërkon anulimin e këtij vendimi. Çollaku thotë se rrija e çmimit te ujit do të ndikojë në buxhetin dhe ekonominë familjare, do të shtojë varfërinë, do të mbyllë bizneset. TIRANA TODAY
