Një ditë më parë, qytetarët marshuan me pankarta, thirrje dhe bllokime rrugësh në Tiranë, Durrës dhe Shkodër për rritjen e çmimeve. Një zëri, qytetarët kërkuan marrjen e masave për uljen e taksave dhe çmimeve deri në mometin që situata të normalizohet. Ata do të dalin çdo ditë në orën 17:00 për të protestuar, ndërsa të shtunën kanë paralajmëruar një marshim kombëtar.
Protestuesit fillimisht u mblodhën para Kryeministrisë me pankarta në duar. Ata kanë bllokuar disa zona si Unaza e kryeqytetit dhe Rruga e Shallvareve, ndërsa i kanë bërë thirrje shoferëve, që të bashkohen me protestën e tyre që në fokus ka uljen e çmimit të naftës dhe produkteve bazë.
Jo vetëm në Tiranë, por protesta për rritjen e çmimeve u zhvillua edhe në Durrës. Qindra qytetarë u mblodhën përpara Bashkisë së qytetit, dhe kërkuan ulje të çmimit të hidrokarbureve dhe lëndëve të tjera bazë.
Në shenjë proteste, qytetarët kanë fikur makinat në orën 17:00, për të kërkuar ulje të çmimit të hidrokarbureve që këto ditë kanë kapur shifra rekord. Nga ana tjetër, qeveria ka arsyetuar se çmimi është ndikuar nga lufta mes Ukrainës dhe Rusisë, duke shtuar se pasojat e asaj beteje do të jenë afatgjata, edhe për vendin tonë.
Po kështu edhe në Shkodër është protestuar. Hyrja e qytetit të Shkodrës u bllokua mesditën e djeshme në shenjë proteste për rritjen e madhe të çmimit të karburanteve, por edhe të çmimeve të ushqimeve kohët e fundit në Shqipëri. Qytetarët kanë vendosur kartona në shenjë reagimi dhe indinjate në urën e Bahçallëkut duke e bllokuar. “Protesto”, “U rritën buka, vajti, tani nafta”, ishin disa nga shkrimet mbi kutitë e kartonit që bllokuan qarkullimin e mjeteve në rrugë. Qytetarët kanë paralajmëruar protesta edhe në ditët në vazhdim.
