Nuk duket të ketë qetësi për Mbretërinë e Bashkuar e cila vijon të shënojë rritje në bilancin ditor të viktimave nga koronavirusi.
Gjendja në këtë vend po njihte një përmirësim të ndjeshëm, deri para pak ditësh kur kurba filloi të rritej sërish.
Në 24 orët e fundit janë shënuar 778 viktima, pra 61 më shumë se ditën e djeshme ku u regjistruan 717 persona të vdekur.
Kështu numri total i viktimave të shënuara nga COVID-19 ka shkuar në 12,107. Ndërkohë janë konfirmuar edhe 5,252 raste të reja, duke e çuar në 93,873 numrin total të personave të infektuar.
Mbretëria e Bashkuar nuk ka raportuar ende se sa është numri i personave që janë shëruar nga virusi vdekjeprurës. Mësohet se 1,559 pacientë në spital ndodhen në gjendje kritike për jetën.
Kjo është java e katërt në “Lock down” për Mbretërinë e Bashkuar, e cila është një nga vendet më të prekura nga koronavirusi në botë.
Ajo renditet e pesta për numrin më të madh të viktimave të shënuara nga COVID-19, pas SHBA, Italisë, Spanjës dhe Francës.
Daily Motion shkruan se nëse mbyllja zgjat për 3 muaj, atëherë 2 milionë britanikë do humbasin vendet e tyre të punës.
