Shkon në 10 numri i të prekurve nga koronavirusi në Shqipëri.
Lajmi u konfirmua nga Ministria e Shëndetësisë përmes një deklarate për mediat. Ministria e Shëndetësisë njofton se deri më tani janë testuar 114 pacientë të dyshuar për koronavirus.
Mësohet se dy prej rasteve nuk kanë pasur kontakt me pacientin “zero”. Ndërsa njëri prej të infektuarve është shtruar në spitalin e Durrësit.
Ministria e Shëndetësisë i bën apel qytetarëve që të shmangin ambientet publike, apo lëvizjet me autobusë.
“Qytetarët duhet të vazhdojnë të zbatojnë masat që janë thënë nga ekspertët, që ne po shohin se nuk po zbatohen. Duhen evituar grumbullimet e mëdha, nuk duhet të shohim njerëz nëpër kafene, restorante, të evitojmë transportin publik, të shmangen daljet e panevojshme nga shtëpia. Nëse merren këto masa, ne i kemi masat për të përballuar kapacitetet. Sistemi është në këmbë, ju lutem qytetarëve të bashkëpunojnë”, tha zv/ministrja e Shëndetësisë, Mira Rakacolli.
Kujtojmë se këto raste janë konfirmuar vetëm brenda 3 ditëve të fundit në vend.
