Tensionet mes Indisë dhe Kinës duket se po përkeqësohen, teksa së fundmi shtetet kanë akuzuar njëra-tjetrën për sulme ushtarake.
Gjigandët aziatikë akuzuan njëri-tjetrin këtë javë për dërgimin e ushtarëve në territorin e tjetrit dhe hapën zjarr paralajmërues për herë të parë në 45 vjet, duke ngritur spektrin e konfliktit ushtarak në shkallë të plotë.
Konflikti nisi në fillim të muajit maj, ndërsa më 15 qershor 20 ushtarë indianë mbetën të vdekur si pasojë e përballjeve. Thuhet se edhe Kina pati humbje në jetë, por vendi komunist nuk raportoi asnjë shifër.
India dhe Kina trashëguan mosmarrëveshjet e tyre territoriale nga periudha e sundimit kolonial britanik.
Tre vjet pas pavarësisë së Indisë në 1947 dhe një vit pasi komunistët erdhën në pushtet në Kinë, qeveria e re në Pekin filloi të pohonte me forcë pretendimet e saj dhe të hidhte poshtë traktatet e mëparshme që thotë se ishin nënshkruar me detyrim.
