Prej së hënës së 24 majit, Italia nisi aplikimin e rregullave të reja për lëvizjen brenda e jashtë kufijve të saj. Udhëtarët që nisen nga Shqipëria duhet të njihen me rregullat e reja përpara se të nisen drejt vendit fqinj.
Autoritetet italianë bënë të ditur se, për të gjithë ata persona që do të hyjnë në territorin italian nga vendet anëtarë të Bashkimit Europian, nga vendet e zonës Schengen, nga Britania e Madhe e nga Izraeli nuk do të jetë më i detyruar karantinimi të paktën 5 ditor.
Por gjithashtu prej ditës së hënë, datë 24 maj 2021, çdo person që do të udhëtojë drejt Italisë është i detyruar të plotësoj një formular dixhital lokalizimi (Passenger Locator Form) i cili do t’i pajisë me një bar kod, i domosdoshëm për të hyrë në pikat kufitare italiane. Ky bar kod do të jetë i detyrueshëm të paraqitet para imbarkimit në porte dhe në aeroporte nga ata udhëtarë që kanë destinacion Italinë.
Regjistrimi do të jetë i detyrueshëm dhe për minorenët e formulari dixhital i tyre do të plotësohet nga prindërit apo nga personat mazhorenë që i shoqërojnë në udhëtimi në Itali. Në këtë formular dixhital regjistrohet informacioni i itinerarit të udhëtimit në Itali, numri i telefonit, adresa e qëndrimit në Itali me qëllim që autoritetet shëndetësore lokale të kenë mundësi lokalizimi në mënyrën më të shpejtë të mundur në rast se verifikohet një rast infektimi tek pasagjerët që kanë mbërritur në Itali me të njëjtin udhëtim.
Ndryshimet, ja kur hapen lokalet dhe hiqet ora policore
Italia nisi të hënën edhe aplikimin e rregullave të reja në nivel kombëtar në politikat antiCovid. Situata në përmirësim e kurbës pandemike, ka bërë që Komiteti Tekniko Shkencor për përballimin e emergjencës shëndetësore, të orientojë qeverinë italiane në futjen e të gjithë territorit italian në një zonë të verdhë, pra në një nivel të ulët infektimi.
Fundjavën e shkuar në Itali u hapën qendrat tregtare, ndërkohë që të hënnë nisën aktivitetin e tyre palestrat. Ndërsa restorantet, lokalet, kafenetë do të presin datën 1 qershor për të rinisur punën dhe në ambientet e mbyllura.
Prej datës 7 qershor është parashikuar që ora policore në Itali të reduktohet nga ora 24.00 në ora 5 të mëngjesit, e më datë 21 qershor pritet të hiqet plotësisht. Ndërsa prej datës 15 qershor do të lejohen festat e martesat por në një protokoll të ngushtë rregullash të përcaktuara nga autoritetet shëndetësore italiane.
