Kristiano Ronaldo do të paraqitet rregullisht në grumbullimin e Juventusit më datë 25 korrik. Trajneri Masimiliano Alegri e pret krahëhapur, po ashtu si edhe shokët e drejtuesit.
Portugezi ka komunikuar me klubin dhe ka bërë të ditur padurimin e tij për t’u rikthyer në stërvitje. Kushdo që ka komunikuar me 36-vjeçarin, është i bindur për vullnetin e tij për të vazhduar qëndrimin në Torino.
Kontrata deri në vitin 2022 e mban të qetë Juven, por me sheikët e PSG-së dhe Florentino Perezin në mes nuk i dihet kurrë. Në Torino do të donin që qëndrimi i Ronaldos të shkonte përtej skadencës së kontratës, e parashikuar për vitin 2022.
31 milionë euro, që së bashku me taksat bëhen 60, janë shumë edhe për një superfuqi si “Zonja e Vjetër”, ndaj nuk do të ishte çudi që rruga e rinovimit të gjendej nën shembullin e Leo Mesit i cili përgjysmoi rrogën për Barcelonën.
