Cristiano Ronaldo është hapur për të kaluarën e tij duke shkruar një letër për fëmijërinë dhe fillet e tija në futboll që është publikuar nga The Players’ Tribune.
“Babai im ishte ekonom në CF Andorinha, ai vazhdimisht më inkurajonte që të shkoja dhe të luaja për ekipin e të rinjve. E dija se kjo do ta bënte krenar, prandaj shkova, më pëlqeu dhe u përfshiva në klub dhe në ndjenjën e fitores”, ka treguar ai.
Derisa tani përfiton miliona, kur ishte i vogël, familja e CR7 kishte vështirësi financiare, ashtu që ai nuk mund të blinte as atlete të reja.
“Është e vërtetë se në atë kohë nuk kishim shumë para. Jeta në Madeira nuk ishte e lehtë asokohe, luaja me atlete të vjetra që mi jepte vëllai ose i huazoja nga kushërinjtë e mi. Kur je fëmijë, nuk të interesojnë paratë”, ka rrëfyer 32-vjeçari më tej.
Është e mahnitshme kur një futbollist që ka fituar thuajse çdo trofe më shumë se dy herë, vazhdon të mbetet i përkushtuar ndaj punës së madhe dhe kërkon vazhdimisht suksese të reja. Portugezi thotë se këtë veçori e ka pasur që nga fëmijëria.
“Pas 400 ndeshjesh me Real Madridin, triumfi është akoma ambicia ime më e madhe. Është gjithçka për mua dhe mendoj se kam lindur i këtillë, megjithëse ndjenja e fitores ka ndryshuar, sepse tash jam në një tjetër kapitull të jetës”, ka deklaruar futbollisti.
Suksesi i Ronaldos u vërejt në kampionatin portugez, kur Sportingu e përfshiu në ekipin e parë kur ai ishte akoma adoleshent dhe menjëherë u vërejt se ishte fjala për një talent të jashtëzakonshëm. Në fakt, procesi i zhvillimit të tij kishte nisur më herët, qëkur kishte shkuar te akademia e këtij klubi në moshën 11 vjeçare.
“Isha 11 vjeç në ditën kur shkova nga ishulli në Akademinë e Sportingut. Ishte periudha më e vështirë në jetën time, por e mbaj mend shumë mirë”.
“Duket e pabesueshme, mirëpo djali im, Cristiano Jr, i cili tash është shtatëvjeçar… është e vështirë të imagjinohet se si do të ndihesha nëse pas katër vitesh do t’ia pakoja gjërat që ai të nisej për në Londër ose në Paris”, ka thënë lojtari.
“Kur isha 15 vjeç, iu drejtova disa bashkëlojtarëve të mi në stërvitje. E mbaj mend shumë mirë. U thashë atyre: ‘Një ditë do të bëhem më i miri në botë’”, është rrëfimi i tij për kohën te Sportingu dhe ambiciet e mëdha të anësorit të famshëm.
Kanë kaluar tetë vjet prej se Ronaldo luan te Los Blancos dhe ai ka arritur suksese të jashtëzakonshme me klubin Spanjoll, duke thyer rekord pas rekordi dhe duke shkruar emrin e tij në librat e historisë së futbollit.
Në këtë rrëfim, lojtari më i mirë i Realit ka treguar se me arritjen në Estadio Santiago Bernabeu e ka përmbushur ëndrrën e tij të fëmijërisë, pasi gjithmonë kishte dashur të luante për Mbretërit.
“Gjithmonë e kam admiruar Real Madridin dhe isha i gatshëm për një sfidë të re. Doja të fitoja trofe në Madrid, të thyeja çdo rekord dhe të bëhesha legjendë e klubit”, ka deklaruar Ronaldo, i cili tashmë e ka bërë këtë.
“Mirëpo, ajo që ka më së shumti rëndësi për kohën time në Madrid dhe ajo që do t’ua them nipërve të mi kur do të jem 95 vjeç, është ndjenja e ecjes në fushë si kampion duke mbajtur për dore djalin tim. Shpresoj që ta bëjmë sërish”, kështu e mbyll shkrimin e tij Ronaldo. /Titana Today/
https://www.youtube.com/watch?v=PZMRTKqVnMw&ab_channel=LucasMendesdeCarvalhoCR
https://www.youtube.com/watch?v=2sJKHj2YVHc&ab_channel=AshStudio7
