Zëdhënësja koordinuese e Komisionit Evropian, Natasha Bertaud, ka lëshuar një deklaratë lidhur me çështjen e votimit të rikthimit të vizave për shqiptarët nga parlamenti i Holandës.
Bertaud sqaron se KE është në dijeni të votimit, por nuk ka marrë ende një kërkesë për pezullimin e vizave:
“Komisioni Europian është në dijeni për votimin e parlamentit holandez për të pezulluar udhëtimin pa viza me Shqipërinë, por nuk ka marrë asnjë kërkesë për pezullim”.
Parlamenti holandez vendosi të martën t’i kërkojë komisionit të pezullojë udhëtimin pa viza me Shqipërinë, teksa mori 92 vota pro nga 150 në total.
“Komisioni është i vetëdijshëm për mocionin që kaloi dje në parlamentin holandez, por ekziston një procedurë specifike që është në vend për mekanizmin e pezullimit të vizave dhe deri më sot nuk kemi marrë asnjë njoftim nga asnjë shtet anëtar që kërkon një gjë të tillë,” tha Natasha Bertaud.
Masa për rikthimin e vizave ishte motivuar nga veprimtaria e grupeve kriminale të lidhura me Shqipërinë.
Shqiptarët kanë qenë në gjendje të udhëtojnë në Bashkimin Evropian pa viza që nga dhjetori 2010. Shqipëria aplikoi për anëtarësim në BE në 2009 dhe mori statusin e kandidatit në 2014.
