Gazetari Blendi Fevziu ka komentuar mbi situatën e Partisë Demokratike, në një intervistë në “Milori Live” në “Klan News”. Ai është pyetur nëse ekziston mundësia e një rikthimi të Bashës si kryetar i PD-së. Fevziu është shprehur se një gjë e tillë do të ishte marrëzi. Ai vendosi pikat mbi “i” duke theksuar se një njeri që ka humbur, duhet të dorëhiqet dhe të mos kthehet më.
Mirela Milori: Ka zëra që thonë se lëvizja e Bashës ka qenë hileqare…
Blendi Fevziu: E kam dëgjuar, por çfarë do të thotë kjo?! Basha është larguar nga kryetari i Partisë Demokratike, po të dojë të rikthehet në gjykimin tim do të ishte marrëzi. Do të dojë ta bëjë këtë përmes votimit.
Në momentin që do ta bëjë këtë përmes votimit, do të ketë kandidatë të tjerë. Nëse ai fiton, le ta gëzojë Partinë Demokratike prapë. Unë jam kundër, sepse unë mendoj se një njeri që ka humbur, duhet të dorëhiqet dhe të mos kthehet më.
Basha dha dorëheqjen e tij si kryetar i partisë opozitare më të madhe në vend, pas 9 vitesh aspak të lavdishme në krye të Partisë Demokratike dhe humbjeve të njëpasnjëshme. Lulzim Basha nuk i rezistoi më presionit të demokratëve.
Duke theksuar se kjo nuk është një tërheqje për rehati personale, Basha sërish la një shteg të hapur për veten duke thënë se “do të jetë i angazhuar në ringritjen e PD rreth vlerave, parimeve dhe standardeve demokratike”.
