Gianni de Biasi mbetet padyshim trajneri më i suksesshëm në stolin e Kombëtares Shqiptare, ku pati dhe kulmin e karrierës së tij teksa e drejtonte atë.
Por, pas shkarkimit të Panuccit, ka zëra për një rikthim të mundshëm të italianit. Megjithatë, lidhur me këtë, De Biasi ka preferuar të mos japë asnjë koment, por as nuk e ka mohuar diçka të tillë, duke e lënë të hapur këtë mundësi.
Sa i takon shkarkimit të Panuccit, në një intervistë për TuttomercatoWeb, De Biasi tha:
“Më vjen keq që Panucci përfundoi këtë aventurë tek Shqipëria, më shumë nuk di të them. Më vjen keq sepse un vijoj të jem një tifoz i Shqipërisë. E ardhmja ime? I kam thënë jo Venezias dhe Frosinones. Objektivi im është që sezonin e ardhshëm të jem në drejtimin e një klubi ose Kombëtareje”.
Tekniku ka zbuluar edhe një prapaskenë kur ishte ende në drejtimin e kombëtares sonë. Ai ka treguar se ka refuzuar Palermon sepse kishte një kontratë me Shqipërinë.
“Herën e parë më ka kontaktuar Zamparini. Ishte në Seria A kur vendosi të largonte De Zerbin, por unë isha në kontratë me Shqipërinë. Më joshi oferta, por nuk mund ta pranoja”, zbuloi De Biasi për “Corriere dello Sport”.
