Kryeministri Edi Rama deklaroi sot se duke filluar nga e shtuna e ardhshme do të nisin fluturimet nga Roma. Kjo për të gjithë ata shqiptarë që kanë mbetur të bllokuar jashtë vendit dhe që duan të riatdhesohen.
Sa i përket personave që vendosin të kthehen, kreu i qeverisë tha se ata do të duhet të qëndrojnë në hotelet e vëna në dispozicion, të cilat do të paguhen prej tyre.
Kryeministri u shpreh se modalitetet në lidhje me këtë do të bëhen publike ditën e nesërme.
“Ju kërkoj që gjithë atyre ndjesë të sinqertë të madhe sepse e marr me mend dhe më dhemb mundi i tyre i pazakontë në pamundësi për t’u kthyer në atdhe.
Turp, turp atyre që luajnë patriotash dhe demokratash, trup të flasësh bijtë e shqipes që u janë prerë krahët nga diktatura e Tiranës apo për mungesën e lirisë për t’u kthyer në shtëpi kur ne e kemi marrë këtë masë në raport me një armik të padukshëm që do të na kishte grirë, do të thotë të nxisësh infektimit.
Në kuadrin e lehtësimeve me pikatore, ne kemi gati planin e rihapjes me shumë kujdes të riatdhesimeve. Nesër do të bëjmë publike modalitetet.
Të shtunën e kësaj jave do të nisin fluturimet, fillimisht nga Roma. Kush dëshiron të riadhesohet të prenotojë avionin dhe pagesat në hotelin përkatës në zinxhirin e hoteleve të vëna në dispozicion.
Atë që duket sot rruga më e gjatë, e cila me siguri na nxjerr më shkurt se çdo rrugë tjetër, kjo është rruga që ta fitojmë me nder dhe me shëndet këtë luftë. Prandaj është kaq e vështirë. Duke parë familjet dhe njëri-tjetrin përditë, nuk e kemi të vështirë të mendojmë se rrugë më të mirë se kjo nuk ka”, tha ai.
