Skënderbeu ndryshon komplet “fytyrë” për këtë sezon. Një ekip totalisht i riformatuar dhe i ndryshuar, në shumë pjesë të sezonit të kaluar, është vënë në dispozicion të trajnerit Ilir Daja. Më shumë lojtarë të rinj në këtë sezon si pjesë përbërëse të ekipit dhe pak senatorë, korçarët dukshëm e kanë kthyer politikën e klubit në promovimin e elementëve të rinj në ekip. Ajo që e ka pësuar së tepërmi ka qenë mbrojtja, e cila, duke lënë mënjanë Jorgo Pëllumbin, nuk ka asnjë lojtar tjetër në përbërje nga ekipi i sezonit të shkuar. Politika e klubit bardhekuq ka qenë e thjeshtë.
Të largojë lojtarët që janë të superpaguar, por edhe ata që kanë arritur njëfarë moshe të caktuar, të cilët nuk mund ta mbanin dot peshën e një sezoni. Këta futbollistë janë zëvendësuar me të rinj me perspektivë, të cilët mund të japin shumë për ekipin dhe të rriten profesionalisht, duke sjellë edhe të ardhura për klubin në merkato, shkruan “Panorama”.
GABIMET E KALUARA – Nga merkatoja e një sezoni më parë nuk ka rezistuar askush. Kjo tregon se Skënderbeu ka bërë dukshëm një merkato jo fort të mirë në sezonin e kaluar, duke përfshirë afrimet e verës, por edhe ata të ardhur në janar. Të gjithë janë të larguar si lojtarë që nuk mund të jepnin asgjë në Korçë. Përjashtimi i vetëm është ai i Bregut, i cili tashmë është një lojtar i afirmuar, dhe Shqiprim Taipi, që tregoi se ishte i vlefshëm për Skënderbeun.
Pjesa tjetër është larguar pa u menduar dy herë dhe gjithçka është zëvendësuar me lojtarë të rinj në moshë. Duke filluar nga kushërinjtë Nuriu që kanë një moshë të re dhe mund të japin kontribut te ky ekip, për të vijuar më pas me talentin e Malësor Ajetit dhe aftësitë e Meksit dhe Merkos. E për të vijuar më pas me sigurinë e Koliçit në portë, eksperiencën e Asion Dajës dhe shtatlartësinë e Marvin Turtullit.
POLLOZHANI – Nëse do ta shikonim nga mosha, do ta rrëzonim filozofinë e Skënderbeut, por Pollozhani është marrë si një senator në Korçë për qëllime të tjera në të ardhmen. 37-vjeçari erdhi në Korçë për gjashtë muaj si futbollist deri në rikthimin e Jashanicës për të dhënë garanci dhe eksperiencë në prapavijë dhe më pas do të kalojë në rolin e ndihmësit të trajnerit Ilir Daja.
