Në konferencën për shtyp pas ndeshjes nuk është paraqitur trajneri i Partizanit, Klevis Dalipi por drejtori sportiv Olsi Rama. Ai ka dalë para kamerave dhe ka ngritur zërin kundër arbitrimit të ndeshjes, po ashtu edhe kundër Federatës Shqiptare të Futbollit e cila sipas Ramës është duke luajtur me dy standarde.
“Jam këtu për të vërtetuar atë që thashë pak ditë më parë në një konferencë për shtyp, që kampionati shqiptar po vendoset nga jasht dhe kjo po vërtetohet. Ndeshja e sotme ishte një katastrofë dhe nuk mund të tolerohet. Ne në këtë sfidë ishim me pesë mungesa dhe e dimë pse mungojnë ata lojtarë. Është e patolerueshme që arbitri të na ndëshkojë në këtë mënyrë me një karton të kuq dhe shumë të verdhë që nuk ka asnjë sens.
Klidens Meta ka vendosur rezultatin e kësaj sfide, pasi u duk ndjeshëm që pas të kuqit ra ritmi i ndeshjes nga ana e Partizanit dhe ky ishte qëllimi. Kjo që po ndodh është e padrejtë sepse po vendoset fati i kampionatit,”- u shpreh Olsi Rama.
“Dënimet nuk janë të barabarta, pasi në ndeshjen e Kupës janë ndëshkuar lojtarët tonë dhe jo të tjerët. U dënua Trashi dhe jo Bakaj. Pasi ai e shau arbitrin nga të katër anët dhe ja ku është në fushë sot, ndërsa lojtarët tonë u dënuan nga Disiplina, kjo është drejtësi me dy standarte.
Tifozët? Edhe në këtë pikë nga Federata aplikohet me dy standarte, pasi tifozët e Tiranës dhe Partizanit duhet të futen në fushë me kartë, ndërsa të Kukësit, Flamurtari jo. Kampionati është produkt i Federatë, ku është Federat në këtë rast?”,- përfundoi Rama.
