Reshjet e shiut të rënë me intensitet të lartë në të gjithë vendin kanë shkaktuar probleme të shumta në toka, rrugë, banese dhe shtëpi banimi. Situatë më të vështirë po kalon Gjirokastra, ndërsa me anë të një shkrese të drejtuar kryeministrit Rama nga kryebashkiakja Zamira Rami, i kërkon shpalljen e gjendjes së emergjencës, pasi sipas saj, pushteti vendor nuk ka mundësi për të përballuar këtë situatë.
E gjendur në këto rrethana,drejtuesja i është drejtuar pushtetit qendror, pasi mjetet e bashkisë së Gjirokastrës janë të papërballueshme. Rami bën një pasqyrë të situatës së rrëshqitjeve të dheut në tre lagje, “Kodra e Shtufit” ku një pallat është zaptuar nga balta dhe dy banesa private rrezikojnë shembjen, në “Cfakë” dhe lagjen “Punëtori” ku sërish paraqiten probleme me banesat, ndërsa për banorët është dhënë urdhri i menjëhershëm i evakuimit.
Përveç problemeve të shumta brenda në qytet, shkresa zyrtare jep një panoramë të të gjitha problematikave në Bashkinë Gjirokastër, ku disa fshatra janë izoluar nga përmbytjet dhe nga shembja e urave, ndërsa akset kryesore rrugore kanë probleme me qarkullimin.
