Seanca e sotme plenare ka nisur me replika mes Bashës dhe Ramës, pasi ky i fundit prezantoi projektbuxhetin 2018.
Gjatë fjalës së tij, Basha përmendi rastin e mjerimit në Bulqizë, i cili u transmetua edhe nga “Le Iene”, ndërsa shtoi se për vëllanë e kryeministrit Rama po përgatiten koncesione.
“Nuk ka asgjë më të trishtë se buxheti i 2018. Në të nuk ka asnjë politikë për fëmijët e Bulqizës, nuk ka asgjë për ekonominë e shqiptarëve, nuk ka asgjë për të ardhmen e vendit. Është një buxhet për krimin dhe klientët e Edi Ramës. Ka vetëm tre momente në këtë buxhet.
I pari është detyrimi pothuajse i çdo biznesi të vogël për të lëshuar faturë me TVSh, është një masë që nuk do sjellë asnjë ndihmesë në të ardhurave, por që veçse do të ndikojë të biznesi. Por çfarë e shtyn një kryeministër të marrë një politikë që dëmton këdo dhe kundërshtohet nga të gjithë, përgjigjja është e thjeshtë, interesat e familjes dhe klientit.
Duke futur në skemën e TVSh gati 100 mijë biznese Rama do justifikohet se shteti nuk ka mundësi dhe kapacitet për të mbikëqyrur këtë numër biznesesh dhe ndaj duhet të jepet me koncesion. Dhe këtë do t’ia japë vëllait të tij, Olsi Ramës. Mjerimi i përket fëmijëve të Bulqizës dhe mbarë vendit, ndërsa koncesionet përgatiten për vëllain e kryeministrit dhe klientët e tij”, tha Basha.
Pas kësaj akuze, kryeministri ka marrë fjalën, ku i tha Bashës se është një kopje e paarrirë e Berishës, ndërsa e thumboi teksa përmendi kreun e LSI-së, Monika Kryemadhi, duke i thënë se ajo e bën të ndihet më i fortë, por nuk e rrit dot:
“Je një kopje e paarrirë e Saliut, sepse je falso, je një kopje.
Prano të vërtetën dhe rritu Lul, sepse PD ka nevojë për një lider të rritur jo të një lideri që nuk rritet dot. Këto janë fjalët e një njeriu që të do, që të ndihmoi të rritesh. Monika të bën të ndjehesh më të fortë por nuk të rrit dot, të zvogëlon. Vëllai im është një njeri i zakonshëm, por unë këtu nuk vij asnjëherë me librin e shpisë së tjetrit.
Këtu nuk është çështje personash, është çështje përkatësie. Ku doni të dilni së bashku?”
