Italia ka regjistruar ditën e sotme numrin më të vogël të viktimave, që prej datës 19 mars.
Mediat vendase raportuan se në 24 orët e fundit në shtetin fqinj kanë ndërruar jetë 525 persona, shifër mjaft e ulët kjo në krahasim me ditët e mëparshme.
Ndërkohë në lidhje me këtë bilanc ka reaguar edhe kryeministri italian, Giuseppe Conte. Në një intervistë për mediat italiane, Conte tha se Italia nuk bëri një përgjigje të përsosur fillimisht, por tani po bën më të mirën dhe është në rrugën e duhur.
Por pavarësisht kësaj, Conte ritheksoi se izolimi kombëtar nuk do të përfundojë, derisa të jepet një vlerësim i saktë shkencor mbi situatën.
“Tani për tani nuk mund të them kur bllokimi nga Coronavirus do të përfundojë,” tha ai. “Ne po ndjekim udhëzimet e komitetit shkencor, por Italia ishte vendi i parë që u përball me urgjencën. Përgjigja jonë mbase nuk ishte e përsosur, por ne kemi bërë më të mirën bazuar në njohuritë tona. Vlefshmëria e masave tona është njohur nga OBSH dhe rezultatet tregojnë se ne jemi në rrugën e duhur”, tha Conte.
