Nuk duket të ketë qetësi për Mbretërinë e Bashkuar, e cila vijon të numërojë qindra viktima në ditë nga koronavirusi.
Pas dy ditësh rënie të kurbës, vendi ka shënuar një tjetër rritje të bilancit në 24 orët e fundit. Sipas Worldometer, brenda 24 orëve kanë humbur jetën 828 persona në Mbretërinë e Bashkuar, 379 viktima më shumë se dje.
Kështu numri total i personave që kanë humbur jetën nga COVID-19 në MB ka shkuar 17,337. Ndërkohë në 24 orët e fundit janë shënuar 4,301 raste të reja, duke e çuar në 129,044 numrin total të personave të infektuar.
Kryeministri Boris Johnson u shpreh dje mjaft i shqetësuar, për një rikthim të dytë të mundshëm të virusit në Britaninë e Madhe.
Mbretëria e Bashkuar renditet e pesta në botë për numrin më të madh të viktimave të shkaktuara nga COVID-19, pas SHBA-ve, Italisë, Spanjës dhe Francës.
Më shumë se 2,5 milionë njerëz nga e gjithë bota janë prekur nga virusi vdekjeprurës, ndërsa mbi 173 mijë persona kanë humbur jetën.
