Dy persona të infektuar me koronavirus janë transportuar me urgjencë drejt spitalit infektiv të Tiranës.
Raportohet se babë e bijë nga fshati Dërmenas i Fierit kanë shfaqur komplikacione me shëndetin.
Më herët ata ishin konfirmuar se ishin me COVID-19, mirëpo ishin karantinuar në shtëpitë e tyre pasi simptomat nuk ishin të rënduara.
Në familjen e tyre është prekur edhe gruaja e cila nuk ka shfaqur simptoma dhe për këtë arsye do të vijojë të qëndrojë në shtëpi.
Pranë spitalit të Fierit kanë mbërritur edhe ekipet e ISHP për të marrë tamponet për 17 mjekë, infermierë dhe sanitarë të këtij spitali të cilët ishin vetëkarantinuar prej disa ditësh, pas kontaktit që kanë pasur me një 61-vjecare, e cila kishte fshehur faktin që kishte qenë në Itali, ku dyshohet se mund të jetë infektuar.
Për të menaxhuar rastet, spitali i Fierit u bëri thirrje pak ditë më parë të gjithë qytetarëve që paraqiten në urgjencë, pediatri dhe maternitet të kenë me vete kartat e identitetit kur paraqiten në këto mjedise dhe të deklarojnë itinerarin nëse kanë pasur lëvizje jashtë vendit.
