Administratori i Njësisë Bashkiake nr. 2 në Tiranë, Elez Gjoza thekson për “Tirana Today” se për regjistrimet fiktive të banorëve duhet të mbajë përgjegjësi ish-ministri i Brendshëm Saimir Tahiri dhe jo ai pasi nuk ka asnjë kontroll apo autoritet mbi gjendjet civile.
Tahiri ka shkelur ligjin
Gjoza akuzon Tahirin se para një viti kur ushtronte detyrën e ministrit të Brendshëm ka anashkaluar komplet ligjin për gjendjen civile, ku çdokush mund të bëhej banor i çdo njësie pa pasur nevojë për kontratë noteriale, qiraje apo certifikatë pronësie.
“Ligji thotë që “çdo qytetar i Republikës së Shqipërisë mund të bëhet banor i çdo njësie administrative, mjafton që të ketë një kontratë noteriale. Ndërsa ministri Saimir Tahiri e hoqi fare këtë pjesë para një viti dhe tha që gjithkush mund të bëhet banor vetëm të shkojë të paraqitet para gjendjes civile”, shpjegoi Gjoza për “Tirana Today.”
Sipas Gjozës, e gjithë kjo procedurë bëhej përmes një ndërlidhësi i punësuar në çdo gjendje civile.
Gjoza e ilustron këtë akuzë me rastin kur sipas tij, Tahiri, dërgoi gjendjen civile të kushërirës së tij në Durrës në mënyrë që ajo të votonte në zgjedhjet lokale për kreun e kësaj bashkie, Vangjush Dako.
“Ky ish-ministër që më sulmoi dhe më sulmon sepse ka frikë nga njësia numër 2. Ai ka bërë një ligj për gjendjen civile, ku nuk ka më kontrata të ligjshme por qytetari paraqitet tek sportelet e gjendjes civile dhe vetëm me miratimin e një ndërlidhësi që punon në njësinë administrative bëhet banor i asaj lagjeje që të marrë shërbimet. Unë i them faleminderit që shkurtohen hallkat dhe shpenzimet e qytetarit. Por, nuk mund të merret ai me vitin 2013 kur janë të gjitha gjërat e ligjshme dhe që t’i shërbejë vetes së tij, kushërirës së tij e cila vajti në Durrës dhe votoi për Vangjush Dakon. Ky është një sulm politik. Unë nuk jam pjesë e hashashit. Ai përgjithnjë do të quhet ministri Saimir Tahiri, i hashashit”, u shpreh Gjoza për “Tirana Today.”
70 banorët fiktivë
Megjithëse Gjoza është kallëzuar penalisht për regjistrimin fiktiv të rreth 70 shtetasve me të njëjtin kod banimi në banesën në pronësi të tij, me qëllim ndikimin në zgjedhjet e përgjithshme, duke u premtuar atyre vende pune në këmbim të votës, ai e mohon një akuzë të tillë.
“Kjo akuzë bie poshtë pasi janë regjistruar 70 persona dhe për çdo person ka një kontratë noteriale, sipas ligjit për gjendjen civile. Kam qenë kryetar dhe tani administrator për t’i shërbyer komunitetit, një komunitet i cili është prej 100 mijë banorësh. Pra, këtu duket keqdashja e policisë së shtetit. Njëkohësisht pasi këta qytetarë kanë gjetur vende të tjera strehimi kanë ikur nga banesa dhe kanë shkuar në vendet që kanë dëshiruar”, tha Gjoza për Tirana Today.
Ai thotë se kjo çështje është shqyrtuar nga prokuroria në vitin 2013 dhe më pas është pushuar.
“Çdo gjë është ligjore në bazë të ligjit shqiptar për gjendjen civile, për pjesëmarrje në fushatë elektorale po ashtu edhe mbi punësimin. Nuk ka asnjë lloj prove që unë të kem punësuar njeri, sepse nuk kam tagrin e këtillë. Çdo gjë e bën kryetari i bashkisë. Edhe sekretaren time ma kanë sjellë në punë. Ky është presion i jashtëzakonshëm që më bëjnë, pasi duan të më frenojnë edhe pas orës 16:00 kur jam qytetar i lirë. Kjo çështje është shqyrtuar edhe në vitin 2013 nga prokuroria e cila pasi shqyrtoi faktet dhe provat, të gjitha dolën të ligjshme. Prokuroria ka thirrur punonjësit e gjendjes civile dhe janë pyetur për të gjitha kontratat noteriale që janë kryer”, shprehet Gjoza.
Sulmi politik
Më tej, ai e quan kallëzimin ndaj tij një vendim politik dhe tendencioz, ndërsa akuzon drejtpërdrejt Saimir Tahirin. Gjithashtu, administratori i bashkisë e shpreh haptazi që pas orarit të punës, ai do ta mbështesë LSI-në.
“Kjo është akuza e dytë që më bëhet dhe është tejet tendencioze dhe politike. Këto janë sulme direkte të ish-ministrit të Brendshëm, të hashashit, Saimir Tahirit, i cili para tre ditësh në një takim patëm në Senatorium, pa frymën dhe pa mbështetjen që ai komunitet i dha LSI-së dhe për vete ishte në minoracë, duke mos zhvilluar dot takimin. Pra, unë jam administrator deri në orën 16:00 dhe pas orës 16:00 jam person politik që i shërbej forcës politike që unë aderoj, brenda ligjeve shqiptare.”
Punësimet
Lidhur me akuzën e vendeve të punës, Gjoza tha për Tirana Today se ka ndihmuar njerëzit duke i punësuar si kamarierë apo banakierë, kur ka pasur mundësi: “Nuk kam asnjë mundësi. Nuk kam firmë. Nuk jam as drejtor, nuk jam as ministër, as kryeministër dhe as prefekt. Po kam ndihmuar njerëzit për t’i futur në punë. Kam futur njerëz në punë, patjetër, kam punësuar kamerierë apo banakierë. Kam shfrytëzuar njohjet e mia personale për t’i ardhur në ndihmë komunitetit dhe do t’i vij vazhdimisht në ndihmë.”
