Pas përfundimit të mbledhjes së Këshillit Politik, Damian Gjiknuri sqaroi se reklamat politike në media do të vazhdojnë të jenë pjesë e kodit zgjedhor.
Në një prononcim për mediat, Gjiknuri deklaroi se buxheti i shtetit do të dyfishojë financimet për partitë politike.
Gjiknuri bëri të ditur se ditën e hënë do të paraqiten amendimet e plotë të kodit zgjedhor.
“Dakordësuam amendimet që lidhet me financimin në zgjedhjeve dhe rolin e medias. Kemi dy tre pika të vogla, deri të hënën do të kemi të gjitha amendimet ligjore përfshirë edhe formatimin e KQZ. Të hënën maksimumi të martën shpresoj që të çoj zyrtarisht draftin e komisionit dhe të vazhdojë diskutimi në parlament. KQZ nuk ka element surprizë, janë parimet që janë bërë publike, po diskutojmë disa procedura për përzgjedhjen e anëtarëve ku do të jetë një skemë e hapur dhe do të reflektohen edhe propozimet e opozitës. Do të lejohen reklamat politike, nuk jemi në kushtet që të ndalojmë reklamat politike. Buxheti do të dyfishojë financimet për partitë dhe raporti do të jetë 1 me 3”, tha ai.
