Deputeti Myslim Murrizi i ftuar në “Arena” në Ora News, tha se për miratimin e reformës në drejtësi me 140 vota pro, ambasada amerikane thirri deputetë me dosje të Sigurimit të Shtetit dhe ata që kishin vjedhur.
“As amerikanët dhe rusët nuk i thonë Myslim Murrizit. SHBA i kërcënoi me një vizë skifterët dhe hajdutët. Thirri ata që kanë dosje të Sigurimit, thirri hajdutët që kanë vjedhur 25 vjet në pushtet, thirri edhe ata që kanë vjedhur makina dhe batanije në Itali. Kanë ardhur dhe kanë votuar rob me pranga në duar. Unë nuk bëj pjesë me këta. Ambasada amerikane, Partitë Popullore, partia e Merkelit kanë folur publikisht. Hera e parë që ndodh në Shqipëri dhe në të gjithë Evropën djegia e mandateve”, u shpreh Murrizi.
Murrizi u shpreh se nuk kishte hequr dorë nga mandati dhe nuk do ta bënte, pasi është një politikan i 91-shit dhe akuzoi se brenda PD-së ka arroganca dhe komunistllëk.
“Nuk jam politikan endacak, por jam atje prej 4 janarit të 1991 dhe do jem vetëm atje derisa të jem në politikë. Nuk të lënë radhë të tjerët, mashtrojnë 4 vjet dhe ikin në një qark tjetër. Arroganca dhe komunistllëku brenda PD-së më dha mundësinë të provoj veten”, theksoi ish-deputeti i PD-së.
