Kryeministri Edi Rama ka folur në lidhje me ngërçin e krijuar lidhur me Reformën Zgjedhore.
I ftuar në emisionin “Opinion”, Rama tha se mazhoranca ka bërë të gjitha lëshimet e arsyeshme në këtë proces.
Një ndër këto lëshime sipas tij është edhe identifikimi biometrik i aplikuar në të gjithë vendin. Kreu i qeverisë theksoi se votimi elektronik është përjashtuar si mundësi.
“Topi është në fushën e PD dhe për sa na takon ne e kemi mbyllur këtë proces. Kemi bërë të gjitha koncesionet e arsyeshme. Le të themi që nëse do ti qëndronim strikt kornizës së rekomandimeve ne nuk duhet ta diskutonim përfshirjen e teknologjisë në zgjedhje sepse ODIHR nuk e ka rekomanduar. Për sa na takon, ne kemi bërë një studim me dëshirën për të adresuar këtë problem që alibia e teknologjisë të binte. Nuk është diçka e pabëshme për të bërë identifikimin biometrik. Votimi elektronik është përjashtuar kategorikisht. Një identifikim offline. Kjo është një gjë që kërkon kohë, unë jam pesimist. Kërkon sepse që nëse një vend shkon drejt teknologjisë të mos shkojë menjëherë por me faza. Ne donim që zgjedhjet në 2019 të shërbenin për të testuar sistemin. Problemi sot është koha”, tha ai.
