Real Madrid e ka mbyllur vitin në mënyrën më të mirë të mundshëm, duke hipotekuar trofeun e 5 për këtë vit futbollistik. Madrilenët triumfuan në finalen e Botërorit të Klubeve, përballë brazilianëve të Gremio dhe goli i vetëm i sfidës u shënua nga ylli portugez Ronaldo. Kjo fitore e fut në histori Real Madridin pasi është i vetmi klub që e ka fituar dy herë radhazi këtë kompeticion, ndërsa për Cristiano Ronaldon është i katërti në karrierë. Ylli portugez po ashtu është i vetmi lojtarë që ka shënuar në dy finale të Botërorit të Klubeve dhe lojtari që ka shënuar më shumë gola, me 7 gola. Gjithashtu, skuadra e Zinedine Zidane ka barazuar Barcelona-n si skuadra me më shumë Botërore për Klube të fituar, me 3 trofe.
Siç e tregon edhe rezultati, ndeshja e zhvilluar në stadiumin “Mohammed Bin Zayed” ka qenë e luftuar. Është dashur një magji e Cristiano Ronaldo në minutën e 58-të për të zhbllokuar takimin. Ylli portugez ka fituar një goditje dënimi, të cilën e ka transformuar në gol me një ekzekutim perfekt. CR7 është bërë lojtari i parë në histori që shënon në dy finale të njëpasnjëshme të Botërorit për Klube dhe golashënuesi më i mirë i kompeticionit me 7 gola. Pak minuta më vonë ai ka realizuar edhe golin e dytë, por arbitri e ka anuluar për një pozicion jashtë loje.
Fitorja mund të kishte qenë më e thellë për spanjollët, por portieri i brazilianëve ka arritur të neutralizojë tentativat e Ronaldo me shokë. Ky ka qenë trofeu i pestë që Real i Zidane ka fituar në një vit kalendarik pas Champions League, La Liga-s, Superkupës së Europës dhe Superkupës së Spanjës.
