Unioni i Gazetareve Shqiptare dënon ashpër dhunën e ushtruar ndaj gazetares Arbana Xharra. Unioni thotë se dhuna ndaj Xharrës është një krim mbi lirinë në Kosovë duke bërë thirrje për zbulimin dhe kapjen e autorëve të këtij krimi.
Gazetarja Arbana Xharra është rrahur dje para banesës së saj në Prishtinë. Xharra u anëtarësua para pak ditësh në PDK, ndërsa dyshohet se është ky shkaku i dhunës së përdorur ndaj saj.
Deklarate e Unionit te Gazetareve Shqiptare
Unioni i Gazetareve Shqiptare shpreh indinjatën e thellë ndaj aktit kriminal të dhunës së ushtruar nga forca okulte që kanë depërtuar në shoqërinë e sotme në Kosovë, të cilat përfaqësojnë hije të zeza kërcënuese ndaj lirisë së fjalës, lirisë së mendimit dhe lirive të tjera themelore të njeriut në këtë pjesë të hapësirës shqiptare.
UGSH denoncon këtë akt, proteston ndaj krimineleve hije dhe qëllimeve të zymta të tyre dhe kërkon nga autoritetet e Republikës së Kosovës që në emër të ligjit dhe të lirisë themelore, të reagojnë fuqishëm për zbulimin dhe kapjen e autorëve të këtij krimi. Hijet e zeza dhe ata që i përfaqësojnë ata janë armiqtë e rrezikshëm të Kosovës dhe shqiptarisë, ata janë kërcënim i madh për gjithë qytetarët e Kosovës. UGSH shpreh solidaritetin e thellë me kolegen kurajoze dhe i uron asaj shërim të shpejtë e kurajo të mëtejshme për misionin si qytetare kurajoze dhe europianiste në Kosovën e sotme.
