Një valixhe e dyshimtë ngriti në këmbë policinë e Tiranës, ndërsa alarmi për bombë rezultoi të ishte i rremë. Për disa minuta zona është rrethuar nga policia, ndërkohë nuk është lejuar asnjë makinë të lëviz në zonë deri në kontrollin përfundimtar.
Valixhja e braktisur është pikasur pranë “Pallatit Kongreseve” para Qendrës së Informimit të BE-së. Policia rrethoi zonën menjëherë pas marrjes së lajmit, ndërkohë pas verifikimit të forcave xheniere rezultoi se ishte bosh dhe pa asnjë problem.
Forcat xheniere kryen shpërthim të kontrolluar, por fatmirësisht valixhja nuk kishte asgjë brenda. Kujtojmë se ka patur edhe raste të tjera në lidhje me çanta të dyshimta, por në fund të gjitha kanë rezultuar fals.
Kohë më parë në ditën e vrasjes së gjyqtares Fildese Hafizi, u njoftua për një valixhe, e cila dyshohej se mund të kishte eksploziv brenda, por edhe ky rast rezultoi i rremë.
Me 6 tetor të vitit të kaluar u njoftua për një valixhe të dyshimtë pranë ambasadës, por edhe ky rast nuk kishte natyrë tjetër krahasuar me rastet e tjera.
Një rast tjetër është shënuar edhe në afërsi të Bashkisë së Tiranës, por pa asnjë problem serioz në lidhje me pretendimet e ngritura. Pyetja lind, a janë të qëllimshme këto valixhe apo janë me vërtete raste që shqetësojnë seriozisht qytetarët, këtë natyrisht s’mund ta themi, por rastet duken të jenë “qesharake” dhe shqetësuese për qytetarët.
